Zec 11 | NdeIBE | STEP | Vula iminyango yakho, wena Lebhanoni, ukuze umlilo uqhunqise imisedari yakho!

Zechariah 11

1 Vula iminyango yakho, wena Lebhanoni, ukuze umlilo uqhunqise imisedari yakho!

2 Lila, wena sihlahla sephayini, ngoba imisedari isiwile; ngokuba izihlahla zobukhosi ziqhunqile! Lilani, mi-okhi yaseBhashani; igusu elivitshileyo selicakazelwe phansi!

3 Lalela ukulila kwabelusi: amadlelo abo ekhethelo asetshabalalisiwe! Lalela ukubhonga kwezilwane: ihlathi elihle leJodani liqhunqile!

Abelusi Ababili

4 Nanku okutshiwo nguJehova uNkulunkulu wami, uthi: “Sana emadlelweni umhlambi wezimvu zokuhlatshwa. 5 Abathengi bazo bayazihlaba bangajeziswa. Labo abazithengisayo bathi, ‘Makadunyiswe uJehova, senginothile!’ Abelusi bazo ngokwabo labo kabaziyekeli. 6 Ngokuba kangisayikuba lozwelo ebantwini belizwe,” kutsho uJehova. “Ngulowo lalowo ngizamnikela kumakhelwane wakhe lenkosini yakhe. Bazalicindezela ilizwe, kodwa kangiyikubalamulela ezandleni zabo.”

7 Ngakho ngizafaka emadlelweni izimvu ezasezikhethelwe ukuya esilaheni, ikakhulu lezo ezaziphathwa kabuhlungu. Ngasengithatha izingwegwe ezimbili ngabiza enye ngokuthi nguThandeka kwathi enye ngathi nguNhlanganiso, ngasengizelusa-ke izimvu. 8 Ngenyanga eyodwa ngaxotsha abelusi abathathu. Izimvu zanengeka ngami, lami zangidina

9 ngathi, “Kangisayikuba ngumalusi wenu. Yekela efayo ife, lebhubhayo ibhubhe. Yekela lezo eziseleyo zidlane inyama yazo.”

10 Ngasengithatha ingwegwe yami ethiwa nguThandeka ngayephula, ngidiliza isivumelwano engangisenzile lezizwe zonke.

11 Sadilizwa ngalelolanga, yikho abadubekayo emhlambini ababengikhangele bakwazi ukuthi lokho kwakuyilizwi likaJehova.

12 Ngabatshela ngathi, “Nxa libona kufanele, ngiphani iholo lami; nxa njalo kungenjalo, yekelani.” Yikho basebengiholisa izinhlamvu zesiliva ezingamatshumi amathathu.

13 UJehova wasesithi kimi, “Yiphosele kumbumbi” – imali engaka ababengilinganisele yona! Ngasengizithatha lezozinhlamvu zesiliva ezingamatshumi amathathu ngaziphosela endlini kaJehova kumbumbimbiza.

14 Ngasengiqamula ingwegwe yami yesibili ethiwa nguNhlanganiso, ngiqamula ubuzalwane phakathi kukaJuda lo-Israyeli.

15 UJehova wasesithi kimi, “Thatha futhi izikhali zomalusi oyisithutha. 16 Ngokuba ngizamisa umalusi welizwe leli ongezukunanza ngezilahlekileyo, angawadingi amazinyane, angawelaphi alimeleyo, angawaphi ukudla aphilayo, kodwa adle inyama yezinonileyo, adlithize lamangqina azo.

17 Maye kumalusi oyisithutha, ohlamuka izifuyo! Sengathi angadliwa yinkemba igalele engalweni lelihlweni lakhe lakwesokunene! Sengathi ingalo yakhe ingahle yome qha, ilihlo lakhe lokunene lihle life kokuphela!”